Psa 2 | KYG | STEP | Na kava'mo hisayafe'mo malaga vaya'mogi apavamusa valete'a apano ne'ae. Vaya'mogimo, mani kava'mo hugune, hu'a apakesamo ne'afiya'monanafa afa'a osugae.

Psalms 2

Goti'a kini vekamo lekana paino ate'niya yokemae

1 Na kava'mo hisayafe'mo malaga vaya'mogi apavamusa valete'a apano ne'ae. Vaya'mogimo, mani kava'mo hugune, hu'a apakesamo ne'afiya'monanafa afa'a osugae. 2 Ma mopafi kava vaya'e kini vaya'apimogi'e'mo Ala kava netega'e lekana paino ateteno uvelimo lakino faleno ate'niya vekalega'e'mo kame hu'ana anatesayafe'mo ali'a anupa hu'a mai'ne'a vegemo hu'apae'mo, yagai'ana latesa'agetae'mo anaiyafi'mo o'maigune, hu'a nehae.

4 Koku'napi'mo fai mai'niya vekamo'a kigi huno apategaiye. Ala kava ne'mo'a, afa gemo nehae, huno nehiye. 5 Aipamo leno apate'neno'ae'mo lokiya gefati'mo nehige'apae'mo atete nehae. 6 Agaemo, ani kava'mo nehaya'monanafa nagaemo Saiyoni kotega naote avele'mo lekana pai'na ate'nova kini vekamo'a yagaino apatesiyafe'mo lekana pai'na ate'nove, huno hapa pai'niye.

7 Kini vekamo'a, Ala kava ne'mo'a hu male'niya gemo ae'na hakalo hu'na lapa paiguve, huno hu'niye. Agaemo, Hemeni afina'mo mafa'ne'nimo ali'na kate'nogeka mai'nane, huno naha pai'niye. 8 Ge huka nafi gege'nao muki alu nofi vaya alu nofi vaya'mo apavale'na ali'na kayapi'mo apatesugeno muki ma mopamo kagaika ya'mo haneno. 9 Kalipa mopaleti'mo alo nehaya samomo kayoteti'mo amagi'nageno aino atagino aise aise nehiya kava huka aeni kayoteti'mo apamagigane, huno naha pai'niye.

10 Ani ge hu'niya'mofe'mo kini vaya'mogitapae, hu'na, alagepa hutapa afiyo. Ma mopafi'mo ne'yagaiya vayane, hu'na, ehetapiye. 11 Lapakaemo koli nehutapaeke'mo Ala kava ne'mo ali'ya'amo aliyo. Atete nehutapaeke'mo lapamogaga aiyo. 12 Mafa'ne'amo haetapa neyo. Fiku yanageno aipamo aise'amo leno lapateteno lapamagisigetapa kate'mo asagautapa aigayanagi. Agaepi'mo e'a fala ki'a ne'maiya vaya'mogimo Goti aulagale'mo alagepa hu'a mai'nayanage'a afa'a apamogaga aigae.